Azərbaycan Nəşriyyatları Assosiasiyasının Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirdiyi “Zəfərin Uşaqları ilə Oxu Marafonu – Şimal bölgəsi məktəblilərinin mütaliə yarışı” layihəsi özünün həyəcan dolu final mərhələsinə çatıb.Anaib.az xəbər verir ki, layihə çərçivəsində Quba, Qusar və Xaçmaz rayonlarında keçirilən təqdimatlar, mütaliə görüşləri və yarış mərhələləri uğurla başa çatıb. Artıq şagirdlər oxuduqları əsərlər üzrə biliklərini sınaqdan keçirdikləri imtahan mərhələsində iştirak ediblər.İmtahan mərhələsi 19 oktyabr saat 12:00-da Quba rayonu Rəhman Məmmədov adına Alekseyevka kənd tam orta məktəbində keçirilib. Yarışda 6 məktəbdən 50 nəfər olmaqla ümumilikdə 300 şagird iştirak edib.Prosesdə Azərbaycan Nəşriyyatları Assosiasiyasının sədri, həmçinin Hədəf Şirkətlər Qrupunun qurucu direktoru Şəmil Sadiq, “XAN Nəşriyyatı"nın direktoru Səbuhi Şahmursoy, “Qədim Qala” Nəşriyyatının direktoru Şöhlət İxtiyaroğlu və ANAİB-ə üzv olan nəşriyyatların nümayəndələri iştirak edərək şagirdləri məlumatlandırıblar və layihənin gedişini izləyiblər. İmtahan sualları dərsliklər müəllifi Nizami Hüseynov tərəfindən tərtib olunub.Bundan əlavə, Quba şəhərində layihəyə dəstək göstərən təşkilatların təmsilçiləri də imtahan prosesində iştirak ediblər.Müsabiqənin nəticələrinə əsasən, birinci yerin qalibinə 1000 manat, ikinci yerin qalibinə 500 manat, üçüncü yerin qalibinə isə 300 manat mükafat veriləcək. İlk 10-luğa daxil olan məktəblilər isə xüsusi hədiyyələrlə təltif olunacaqlar.Layihənin mükafatlandırma mərasimi yaxın günlərdə baş tutacaq I Quba Kitab Sərgisi çərçivəsində keçiriləcək.

Azərbaycan Nəşriyyatları Assosiasiyası (ANAİB) tərəfindən təşkil olunan, QHT-lərə Dövlət Dəstəyi Fondunun maliyyələşdirdiyi “Zəfərin Uşaqları ilə Oxu Marafonu” layihəsi çərçivəsində Quba, Qusar və Xaçmaz rayonlarından olan 15 məktəbdə şagirdlərə ümumilikdə 10.000-dən çox “Mənim kitab daxılım” hədiyyə edilib. Anaib.az xəbər verir ki, bunun üçün Quba rayonu Bayram Şıxəmirov adına Zərdabi qəsəbə tam orta ümumtəhsil məktəbində təşkil olunmuş tədbirdə Qubadan 8, Qusardan 3, Xaçmazdan 5 məktəbin nümayəndə heyəti iştirak edib. Layihə rəhbəri Şəmil Sadiq nümayəndələrə layihə barədə ətraflı məlumat verib, onları keçirilməsi nəzərdə tutulan sərgi-festivalda fəal olmağa çağırıb. Layihə kuratoru Səbuhi Şahmursoy isə “Mənim kitab daxılım”ın məqsədindən, uşaqlara verdiyi müsbət təsirdən danışıb. Layihənin əsas məqsədi uşaqlar arasında kitab oxuma vərdişlərini gücləndirmək, mütaliəni təbliğ etmək və Zəfər ruhunu maarifləndirici şəkildə yaşatmaqdır. Paylanılan kitab daxılları məktəblilərdə fərdi oxu mühiti formalaşdırmaq, şəxsi kitabxana yaratmağa cəhd etmək, kitab sərgilərində fəal iştirakçılığı təmin etmək üçün nəzərdə tutulub. Eyni zamanda bu daxıllar həmin məktəblilərin şagirdləri üçün 31 oktyabr – 1 və 2 noyabr tarixlərində keçiriləcək I Quba Kitab Sərgisinə rəsmi dəvətdir. Sərgi çərçivəsində məktəblilər üçün görüşlər, kitab müzakirələri, müəlliflərlə tanışlıq və müxtəlif maarifləndirici tədbirlər təşkil ediləcək. Qeyd edək ki, “Zəfərin Uşaqları ilə Oxu Marafonu” qaliblərinin mükafatlandırılma mərasimi də sərginin ilk günü təşkil olunacaq. Layihə Quba-Xaçmaz Regional Təhsil İdarəsi, QafqazTV, Azərbaycan Dövlət Pedaqoji Universitetin Quba Filialı, MUSİAD Azərbaycan və QİAB-ın tərəfdaşlığı, 525-ci qəzet və edebiyyat və incəsənət.az-ın isə informasiya dəstəyi ilə həyata keçirilir.

Azərbaycan Nəşriyyatlar Assosiasiyası (ANAİB) XI Bakı Beynəlxalq Kitab Sərgisində fəal iştirakını uğurla başa vurub.ANAİB xəbər verir ki, sərgi günləri ərzində ANAİB-in stendi həm yerli, həm də beynəlxalq nəşriyyat nümayəndələrinin diqqət mərkəzində olub. Təşkilat nümayəndələri yerli və xarici nəşriyyatlarla görüşlər keçirib, əməkdaşlıq imkanlarını müzakirə edib və oxuculara zəngin nəşr nümunələrini təqdim ediblər.Sərgi çərçivəsində Azərbaycan və Qətər nümayəndələri arasında keçirilən görüş xüsusi əhəmiyyət kəsb edib. Görüş zamanı qonaqlara ölkəmizin nəşriyyat sahəsi, çap olunan kitablar və ANAİB-in fəaliyyət istiqamətləri barədə geniş məlumat verilib. Qətər tərəfi də öz nəşriyyat fəaliyyəti və kitab sənayesi haqqında təqdimatla çıxış edib. Tərəflər gələcəkdə birgə layihələrin həyata keçirilməsi barədə ilkin razılığa gəliblər.Görüşdə ANAİB-in sədri Şəmil Sadiq “Xəmsə” əsərini qətərli nümayəndələrə hədiyyə edib, qonaqlar isə “Qətər incəsənəti”- nə dair nəşri təqdim ediblər. Bu qarşılıqlı mübadilə iki ölkə arasında nəşriyyat sahəsində yeni əməkdaşlıq körpülərinin qurulması baxımından mühüm addım kimi qiymətləndirilir.Sərgi çərçivəsində həmçinin Gürcüstan Naşirlər Birliyinin sədri ilə görüş keçirilib və qarşılıqlı maraq doğuran məsələlər müzakirə olunub.ANAİB stendi sərgi boyunca yalnız kitab təqdimatları ilə deyil, həm də rəsmi qonaqlar və imza saatları ilə fərqlənib. Stenddə millət vəkili, yazıçı Fazil Mustafa, ANAİB idarə heyətinin sədri Şəmil Sadiq və yazıçı Varis oxucularla görüşərək kitablarını imzalayıb. Rövşən Abdullaoğlunun kiçik seminarı isə xarici əməkdaşlarla keçirilmişdir. Eyni zamanda, Mədəniyyət naziri Adil Kərimov ANAİB idarə heyəti ilə görüşərək müasir nəşriyyat sektoru və gələcək əməkdaşlıq imkanlarını müzakirə edib.Yeni əlaqələr, yeni ideyalar və gələcək əməkdaşlıqlarla ANAİB XI Bakı Beynəlxalq Kitab Sərgisini uğurla tamamlayıb. 

Azərbaycan Nəşriyyatları Assosiasiyası İctimai Birliyinin Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirdiyi “Zəfərin uşaqları ilə Oxu Marafonu” – Şimal bölgəsi məktəblilərinin mütaliə yarışı” layihəsinin sayca ikinci görüşü müəllimlərlə keçirilib. Quba rayonu Rəhman Məmmədov adına Alekseyevka kənd tam orta ümumtəhsil məktəbində baş tutan təlimdə ANAİB İdarə Heyətinin sədri Şəmil Sadiq, layihənin təlimçiləri “XAN Nəşriyyatı”nın direktoru Səbuhi Şahmursoy, “Altun kitab” nəşriyyatının direktoru Rafiq İsmayılov, ekspertləri “Qədim Qala Nəşriyyatı”nın direktoru Şöhlət Səlimov, “Libra kitab” nəşriyyatının rəhbəri Veysəl Məmmədov, “Ağıllı bala” nəşriyyatının rəhbəri Fatimə Alxaz, yazıçı Rövşən Abdullaoğlu, Quba-Xaçmaz Regional Təhsil İdarəsinin müdir müavini Pərvin Ağasıyev, Quba-Xaçmaz Regional Təhsil İdarəsinin Tədrisin keyfiyyəti sektorunun məsləhətçisi Məmmədşah İsrafilov, eləcə də marafonda iştirak edən məktəblərin kitabxana müdirləri və müəllimləri iştirak edib. Layihənin təlimçiləri və ekspertləri seçilmiş məktəblərin müəllim və kitabxanaçılarına layihənin məqsəd və fəaliyyət planı barədə geniş məlumat verib. Onlar üçün məktəbdə kitab oxuma vərdişlərinin və bunun vasitəsilə vətənpərvərlik hisslərinin aşılanması, kitab müzakirələrinin düzgün təşkil olunması və oxuyub-anlama mövzusunda ümumilikdə 6 saatlıq təlim təşkil olunub. Layihənin təlimçisi Rafiq İsmayılov – “Oxuyub-anlama zəka göstəricisi kimi" və digər təlimçi Səbuhi Şahmursoy – “Şagirdlərə intellektual mirasın ötürülməsi formaları” haqqında geniş məlumat veriblər. Layihənin ekspertləri Veysəl Məmmədov – “Məktəbdə kitab oxuma vərdişlərinin yaradılması”, Fatimə Alxaz – “Sinifdə kitab müzakirələrinin təşkili və təşviq vasitələri” və Şöhlət İxtiyaroğlu – “Vətən haradan başlayır” mövzusunda seminar veriblər. Sonda verilən seminarların nəticəsi müəllimlərlə müzakirə edilib və layihəylə bağlı müəllimləri maraqlandıran suallar cavablandırılıb. Layihə QHT-lərə Dövlət Dəstəyi Agentliyinin maliyyə dəstəyi, ANAİB-in təşkilatçılığı, Quba-Xaçmaz Regional Təhsil İdarəsi, QafqazTV, Azərbaycan Dövlət Pedaqoji Universitetin Quba Filialı, MUSİAD Azərbaycan və QİAB-ın tərəfdaşlığı, 525-ci qəzet və edebiyyat və incəsənət.az-ın isə informasiya dəstəyi ilə həyata keçirilir. Qeyd edək ki, layihənin sonrakı mərhələsində marafona qoşulan 6 məktəbdən 300 şagirdlə görüşün keçirilməsi nəzərdə tutulub.

29 – 31 avqust tarixlərində “Azərbaycan Nəşriyyatları Assosiasiyası” İctimai Birliyinin (ANAİB) Nizami Rayon İcra Hakimiyyətinin birgə təşkilatçılığı ilə Nizami rayonundakı Heydər Əliyev adına parkda artıq ənənə halını almış III Bilik Kitab Sərgisi keçiriləcək. ANAİB xəbər verir ki, layihənin məqsədi ölkədə kitabçılığı inkişaf etdirmək, gənclərin intellektual mühitə adaptasiyasını aktual saxlamaq, oxucu – yazıçı münasibətlərini stimullaşdırmaq, endirimli kitablar təqdim etmək və bununla cəmiyyətə mütaliənin əhəmiyyətini aşılamaqdır. Sərgidə məktəbli ləvazimatları, test topluları, vəsaitlər, həmçinin bədii kitabların satışı təşkil olunacaq. Sərgiyə 20-dən çox nəşriyyat və mağaza qatılacaq. Üç günlük kitab bayramında 80 faizədək endirim nəzərdə tutulub. Giriş sərbəstdir. Qeyd edək ki, I Bilik Kitab Sərgisi 2022-ci ilin  9 – 11 sentyabrında, II Bilik Kitab Sərgisi isə 2023-cü ilin 8 – 10 sentyabr tarixlərində paytaxtın Nizami rayonundakı Heydər Əliyev adına parkda keçirilib.