İyunun 25-də “Azərbaycan Nəşriyyatlar Assosiasiyası” İctimai Birliyi (ANAİB) idarə heyətinin 2025-ci ilin birinci yarımilinin yekunu ilə bağlı iclası keçirilib. Anaib.az xəbər verir ki, ANAİB idarə heyətinin sədri Şəmil Sadiq iclasın planını təqdim edib, idarə heyətinin üzvü Şöhlət İxtiyaroğlu isə 2025-ci il ərzində keçirilmiş sərgilərlə bağlı ümumi hesabat verib. Daha sonra görülən işlərə dair irad və təkliflər səsləndirilib, fikir mübadiləsi aparılıb. İdarə heyətinin sədr müavini Nurman Tariq sərgilərin təşkil olunması və tərtibatının düzgün qurulması haqqında danışıb. Məlum olub ki, Gəncə, Sumqayıt, Naxçıvan, Lənkəran və xüsusilə Bakı şəhərində keçirilən Uşaq Kitab Festivalı ən effektiv göstəricilərlə yadda qalıb.Növbəti mövsümdə keçirilməsi planlaşdırılan Bilik (29 – 31 avqust), Gəncə (14 – 16 noyabr), eləcə də Sumqayıt (5 – 7 dekabr) sərgiləri ilə bağlı ilkin hazırlıq və təşkilati məsələlər də iclasın əsas mövzularından olub. Müzakirə edilən məsələlərdən biri də “Zəfərin uşaqları” layihəsinin mövcud mərhələsi və ilkin analizləri olub. Layihə üzrə aparılan işlər barədə ANAİB idarə heyətinin üzvü Səbuhi Şahmursoy məlumat verib, bildirib ki, layihənin sərgi formatında icrası 24 – 26 oktyabra planlaşdırılır. İclasda ANAİB-ə üzv olmaq istəyən nəşriyyatların da müraciətlərinə də baxılıb və “Logos” nəşriyyatının müraciətinə müsbət, “Çamlıca”, “Buta” nəşriyyatlarının müraciətinə isə mənfi cavab verilib.Birliyin Təftiş komitəsinin üzvü Yusif İlhamoğlu əvvəlki sərgilər zamanı qeydə alınmış bəzi qayda pozuntularından danışıb, bu halların təkrarlanmaması üçün konkret təkliflər irəli sürüb.İclas müzakirələrlə davam edib. 

31 may – 1 iyun tarixlərində Azərbaycan Nəşriyyatlar Assosiasiyasının (ANAİB), Azərbaycan Respublikası Mədəniyyət Nazirliyinin, Mingəçevir Şəhər Bələdiyyəsinin və Mingəçevir şəhər İcra Hakimiyyətinin təşkilatçılığı ilə I Mingəçevir Kitab Sərgisi keçirilib. Anaib.az xəbər verir ki, sərgidə endirimli kitab satışı ilə yanaşı, yazıçılarla görüş, imza saatları, panellər, nağıl saatları və musiqi proqramı da təşkil olunub.  25-dən çox nəşriyyat, 60-a yaxın ədib və ziyalının iştirak etdiyi sərgi 1 İyun  – Uşaqların Beynəlxalq Müdafiəsi Gününə həsr olunub.Mingəçevir şəhər bulvarında baş tutan bayram əhvali-ruhiyyəli sərgidə minlərlə kitab 90 %-dək endirimlə təklif olunub.Sərginin açılış mərasimində ANAİB idarə heyətinin sədri Şəmil Sadiq, Mingəçevir Şəhər İcra Hakimiyyətinin başçısı İlham İsmayılov, Mingəçevir Dövlət Universitetinin rektoru Anar Eminov, Mingəçevir Bələdiyyəsinin sədri Anar İsmayılov çıxış edib, bu kimi tədbirlərin önəmindən söz açıblar.Sərgidə deputat Ceyhun Məmmədov, yazıçılar İradə Qədirova, Elgüsel, Şəfa Vəli, Ceyhun Salmanov və təlimçi Orxan Şahbaz da iştirak ediblər. müxtəlif panellər, təqdimatlar, imza günləri, və musiqili proqram təşkil olunub. 

ANAİB-in təşkilatçılığı, “Amal” xeyriyyə cəmiyyətinin sponsorluğu ilə VII Kitabqurdu Sumqayıt Məktəblilərinin Oxu Marafonuna start verilib. Anaib.az xəbər verir ki, marafonun təqdimat mərasimi IV Sumqayıt Kitab Sərgisi çərçivəsində Sumqayıt Dövlət Universitetində baş tutub.ANAİB-in koordinatoru Səma Məstəliyeva marafonun şərtləri haqqında tədbir iştirakçılarına geniş məlumat verib. Marafonun layihə rəhbəri, “XAN Nəşriyyatı”nın direktoru Səbuhi Şahmursoy ideyanın yaranmasından, bu kimi addımların ölkə kitabçılığına xeyrindən danışıb. “Amal” xeyriyyə cəmiyyətinin rəhbəri Rüfət Mirzəyev isə cəmiyyətin həyata keçirdikləri layihələrdən, Kitabqurdu Marafonu ilə necə tanış olmasından söz açıb.Marafonda iştirak edən kitabların müəllifləri – Aynur Cavid, Mürşüd İsmayılov, Elgüsel, Əziz Sultan marafon barədə təəssüratlarını bölüşüb və iştirakçı məktəblilərə uğurlar arzulayıblar. Sonda balaca oxucular kitablarını imzalatdırıb, yazıçılara suallarını ünvanlayıblar.