5–7 dekabr tarixlərində Sumqayıtda yerləşən Kimyaçı Mədəniyyət Sarayında V Sumqayıt Kitab Sərgisi keçirilib. Sərgi “Azərbaycan Nəşriyyatları Assosiasiyası”nın təşkilatçılığı və Azərbaycan Respublikası Mədəniyyət Nazirliyi və Sumqayıt Şəhər İcra Hakimiyyətinin dəstəyi ilə baş tutub.Sərgidə 30-dan çox nəşriyyat, 40-a yaxın yazıçı iştirak edirb.Sərginin sponsorları BP və tərəfdaşları, eləcə də Sufle Şirniyyat Evidir.Açılış mərasimində Azərbaycan Nəşriyyatları Assosiasiyası idarə heyətinin sədri Şəmil Sadiq, Azərbaycan Respublikası Mədəniyyət Nazirliyinin kitab sənayesi şöbəsinin rəhbəri Vasif Qurbanzadə, millət vəkili Mehriban Vəliyeva, Qazaxıstanda yerləşən Turan Akademiyasının prezidenti, professor Rahman Alşanov, Azərbaycan Yazıçılar Birliyinin Sumqayıt filialının Poeziya bölməsinin rəhbəri İbrahim İlyaslı və Azərbaycan Prezidentinin rəsmi təqaüdçüsü şair, əməkdar müəllim Ofeliya Babayeva çıxış edib.Sərgi çərçivəsində V Kitabqurdu Sumqayıt Məktəblilərinin Oxu Marafonunun mükafatlandırılma mərasimi keçirilib. Mərasimdə Kitabqurdu Marafonu layihəsinin rəhbəri, "XAN Nəşriyyatı"nın direktoru Səbuhi Şahmursoy, marafonun sponsoru AMAL Xeyriyyə Cəmiyyətinin rəhbəri Rüfət Mirzəyev çıxış edib. Mərasimdə imtahanda ən çox bal toplayan məktəblilər mükafatlandırılıblar. I yeri Yusifzadə Leyla Müşfiq qızı, II yeri Babayev Fərid Elnur oğlu, III yerləri Məmmədov Möhsin İsmayıl oğlu, Cavadzadə Kürşən Tural qızı, Rəhimli Söhbət Beyrək oğlu qazanıblar.Birinci yerin qalibi 1000 azn, ikinci yerin qalibi 500 azn və üçüncü yerlərin qalibləri hər biri 100 azn dəyərində mükafatlandırılıblar.Digər 8 nəfər isə sertifikat və hədiyyələrlə təltif olunublar.Sərgi müddətində müxtəlif yazıçılarla imza mərasimləri, o cümlədən Varis Yolçuyev, İradə Qədirova, Reyhan Yusifqızı, Aytac Qəmbərova, Elxan Elatlı, Müşfiq Ötkün, Rövşən Abdullaoğlu, Aysel Rəsulzadə, İlqar Kamil və Nəzrin Şirinzadə ilə görüş keçirilib. Ümumilikdə sərgiyə 20.000-dən çox ziyarətçi gəlib.

Hədəf Şirkətlər Qrupunun qurucu direktoru, Azərbaycan Nəşriyyatları Assosiasiyasının sədri, dosent Şəmil Sadiq Türk dünyası mədəniyyəti, elmi və təhsilinə verdiyi töhfələrə görə Qazaxıstanın Türküstan şəhərində TÜRKSOY medalı ilə təltif edilib. Nüfuzlu mükafata layiq görülməsi ilə bağlı öz təəssüratlarını “Media25”-lə bölüşən Ş.Sadiq bu təltifin TÜRKSOY-un Azərbaycan nəşriyyat sektoruna verdiyi dəyər kimi qiymətləndirib:“Mükafatı TÜRKSOY-un Baş katibi, hörmətli Sultan Raevin əlindən qəbul etmək mənim üçün ayrı bir qürurdur. Medalda qeyd olunur ki, bu təltif Türk dünyasının təhsili, mədəniyyəti və maariflənməsinə göstərilən xidmətlərin və uzun illər ardıcıl fəaliyyətin qiymətləndirilməsi məqsədi daşıyır. Mən bu mükafatı heç vaxt təkcə öz adımla bağlı görmürəm. Bu medal Hədəf Şirkətlər Qrupu komandasının, Azərbaycan nəşriyyatları Assosiasiyasının, yazıçı və şairlərimizin, kitab sərgilərimizdə, oxu marafonlarımızda, türk dünyası ilə bağlı layihələrimizdə bizimlə yol gedən bütün tərəfdaşlarımızın uğurudur. Çıxışımda da vurğuladığım kimi, bu medal mənim şəxsi fəaliyyətimlə yanaşı, Azərbaycan kitabının, nəşriyyatlarının, təhsillə bağlı fəaliyyətlərimizin, müəllif və tərcüməçilərimizin, kitab sərgilərimiz və oxu layihələrimizin tanınması deməkdir. Türk dünyasının ortaq mədəni məkanında Azərbaycan sözünün daha gur səslənməsi üçün bundan sonra da səylə çalışacağıq.”"TÜRKSOY medalı mənim üçün Türk dünyasında kitab və mədəniyyət körpülərinin qurulması yolunda atılan addımların rəmzi bir təsdiqi, həm də gələcək işlər üçün məsuliyyət siqnalıdı",-deyən Şəmil Sadiq vurğulayıb ki, məqsədimiz Azərbaycanı regionda nüfuzlu nəşriyyat mərkəzi kimi daha da gücləndirmək və Türk dünyasının ortaq mədəni yaddaşına xidmət edən layihələri davam etdirməkdir:“2023-cü ildə Bakı Beynəlxalq Kitab Sərgisində təşəbbüsümlə Turan Nəşriyyatlar Birliyi təsis olunub və bu birlik də Türk dünyasında nəşriyyat əməkdaşlığının mühüm platformalarından birinə çevrilməkdədir. Bu yolda yanımda olan hər kəsə – komandama, müəllimlərimizə, tərəfdaşlarımıza və oxucularıma ürəkdən təşəkkür edirəmBu medal hamımızındır”...

Noyabrın 26-da Qazaxıstanda Türküstan Kitab Sərgisinin açılış mərasimi keçirilib.Sərgidə Azərbaycan Nəşriyyatlar Assosiasiyasının (ANAİB) üzvü olan Hədəf Nəşrləri, XAN Nəşriyyatı və Altun Kitab Nəşriyyatı da öz stendləri ilə iştirak edirlər.  Sərgiyə fəxri qonaq kimi qatılan ANAİB İdarə Heyətinin sədri, filologiya üzrə fəlsəfə doktoru Şəmil Sadiq qeyd edib ki, kitab milli kimliyin qoruyucusu və mədəniyyətimizin ipək yoludur. “Bu festival yalnız kitab təqdimatı deyil, türk dünyasının ortaq mədəni xəritəsinin yenidən çəkilməsi, oxucularla nəşriyyatlar arasında körpünün qurulmasıdır. Festival türk dünyasının sözə, kitaba və mədəniyyətə olan sevgisinin bayramıdır”, – deyə Şəmil Sadiq öz çıxışında vurğulayıb. Türk dünyasının filosof şairi, azərbaycanlı mütəfəkkir Hüseyn Cavidin “Turana qılıncdan daha kəskin ulu qüvvət, yalnız mədəniyyət, mədəniyyət, mədəniyyət” fəlsəfəsini xatırladan Şəmil Sadiq tədbiri Azərbaycan nəşriyyatlarının və türk dünyası oxucularının mədəni əlaqələrini möhkəmləndirən, fikir mübadiləsinə imkan yaradan və gələcək üçün yeni əməkdaşlıq imkanlarını açan mühüm platforma kimi dəyərləndirib. Sərgi çərçivəsində TÜRKSOY-un Baş katibi Sultan Raev Azərbaycan stendini ziyarət edib

ANAİB İdarə Heyətinin sədri, Hədəf Şirkətlər Qrupunun qurucu direktoru, filologiya üzrə fəlsəfə doktoru Şəmil Sadiq və “XAN Nəşriyyatı”nın direktoru Səbuhi Şahmursoy Qazaxıstanın ən böyük nəşriyyatı olan “Foliant”ın direktoru Nurlan İsabəyovla görüşüb.ANAİB xəbər verir ki, görüşdə iki ölkə arasında nəşriyyat sahəsinin müqayisəli perspektivləri, eləcə də qarşılıqlı həyata keçiriləcək planlar barədə söhbətlər aparılıb. Şəmil Sadiq bildirib ki, Qazaxıstanlı oxucuların Azərbaycanlı müəlliflərlə tanışlığı mühüm məsələdir və bu istiqamətdə düşünülmüş addımlar atılmalıdır. Bunun üçün qardaş ölkələrin nəşriyyatları arasında əməkdaşlıq imkanları qurulmalı və genişlənməlidir. Qazaxıstanın kitab çapı və nəşriyyat sahəsi barədə geniş məlumat verən Nurlan İsabəyov bildirib ki, Azərbaycan nəşriyyatları ilə əməkdaşlıq imkanlarını araşdırılır. Vurğulayıb ki, Azərbaycana gəlişinin əsas məqsədlərindən biri 26–28 noyabr tarixlərində Qazaxıstanda keçiriləcək Türküstan Kitab Sərgisinə azərbaycanlı naşirləri şəxsən dəvət etməkdir.Görüşdə səsləndirilən təklif ANAİB rəhbərliyi tərəfindən müsbət qarşılanıb və geniş tərkiblə bu sərgidə iştirak etmək barədə qərar qəbul edilib.

Azərbaycan Nəşriyyatları Assosiasiyası İctimai Birliyi (ANAİB) Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirdiyi “Zəfərin Uşaqları ilə Oxu Marafonu – Şimal bölgəsi (Quba, Qusar, Xaçmaz) məktəblilərinin mütaliə yarışı” layihəsini uğurla yekunlaşdırıb.Layihənin rəhbəri filologiya üzrə fəlsəfə doktoru, ANAİB İdarə Heyətinin sədri və Hədəf Şirkətlər Qrupunun qurucu direktoru Şəmil Sadiq, icraçısı isə XAN Nəşriyyatının direktoru, ANAİB İdarə Heyətinin üzvü Səbuhi Şahmursoy olub.Layihənin məqsədi şimal bölgəsində məktəblilər arasında oxu vərdişlərini inkişaf etdirmək, vətənpərvərlik hisslərini gücləndirmək, milli-mənəvi dəyərləri təbliğ etmək və Azərbaycan dilinin zənginliyini nümayiş etdirmək olub.Layihənin yekun mərhələsi olaraq 31 oktyabr–1, 2 noyabr tarixlərində Quba şəhərində yerləşən Heydər Əliyev Mərkəzində I Quba Kitab Sərgisi keçirilib. Üç gün davam edən sərgi zamanı tanınmış yazıçı və şairlərin iştirakı ilə müxtəlif təqdimatlar, imza saatları və oxucu görüşləri baş tutub.Açılış mərasimində layihə rəhbəri Şəmil Sadiq, Quba Rayon İcra Hakimiyyəti başçısının müavini Tariyel İbrahimov, MÜSİAD Azərbaycan İdarə Heyətinin sədri Rəşad Cabirli, “Ayna”–“Zerkalo” qəzetlərinin təsisçisi və baş redaktoru, Azərbaycan Jurnalistlər Birliyinin sədri Elçin Şıxlı, xalq şairi Rüstəm Behrudi, Azərbaycan Yazıçılar Birliyinin katibi Səlim Babullaoğlu, eləcə də AYB Quba bölməsinin sədri, şair Ramiz Qusarçaylı çıxış ediblər.Tədbirdə tanınmış yazarlar – Varis Yolçuyev, Elxan Elatlı, Rövşən Abdullaoğlu, Gülzar İbrahimova, Əziz Yaqubzadə, Eyvaz Zeynalov, Aynur Cavid, Elgüsel və Orxan Bəyov iştirak ediblər. Onların hər biri oxucularla görüşlər keçirib, ədəbiyyatın insan və cəmiyyət həyatındakı roluna dair maraqlı fikirlər səsləndiriblər.Sərgi çərçivəsində həmçinin məktəblilər, müəllimlər və kitabxanaçılar üçün maarifləndirici tədbirlər, ədəbi müzakirələr və “Zəfərin Uşaqları ilə Oxu Marafonu” qaliblərinin mükafatlandırma mərasimi təşkil olunub.İmtahanda ən yüksək nəticə göstərən ilk 10 iştirakçı mükafatlandırılıb. 4–10-cu yerləri qazanan iştirakçılara qiymətli kitablar və sertifikatlar təqdim olunub. İlk 3 yerin qalibinə isə qiymətli hədiyyələrlə bərabər diplom və pul mükafatları da təqdim olunub. I yerin qalibi Köhnə Xaçmaz kənd orta məktəbinin şagirdi Əliyeva Zəhra Müzəffər qızı 1000 AZN, II yerin qalibi Quba şəhər 2 saylı məktəbin şagirdi Əmrahov Tunar Vüsal oğlu 500 AZN, III yerin qalibi Köhnə Xaçmaz kənd orta məktəbinin şagirdi Məhərrəmova Aydan Saleh qızı 300 AZN ilə mükafatlandırılıblar.Layihə və sərgi Quba-Xaçmaz Regional Təhsil İdarəsi, Quba-Xaçmaz Regional Mədəniyyət İdarəsi, Azərbaycan Dövlət Pedaqoji Universitetinin Quba filialı, MÜSİAD Azərbaycan, QİAD, “Yurd” Gənclərin İntellektual İnkişafına Dəstək İctimai Birliyinin tərəfdaşlığı ilə həyata keçirilib. İnformasiya dəstəyi Qafqaz TV və “525-ci qəzet” olub.Məlumat üçün qeyd edək ki, “Zəfərin Uşaqları ilə Oxu Marafonu – Şimal bölgəsi məktəblilərinin mütaliə yarışı” layihəsi Quba, Qusar və Xaçmazdan 6 məktəbin (ümumilikdə 300 şagird, 108 müəllim və 6 kitabxanaçının) iştirak etdiyi mütaliə müsabiqəsi idi. Layihə müddətində məktəblilər tərəfindən oxunulan 5 kitab bunlardır:1. Əziz Sultan – “Mübariz Olmaq”;2. Arif Əliyev – “Yalama”;3. Şəmil Sadiq – “Zəfər yolu”;4. Rövşən Abdullaoğlu – “Mən yeməli deyiləm”;5. Əzizə Cəfərzadə – “Anamın nağılları”.Mütaliə müddəti bitdikdən sonra şagirdlər seçilmiş kitablar əsasında hazırlanan suallardan ibarət imtahanda iştirak edib qalibiyyət uğrunda mübarizə aparmışdılar.