16 – 20 oktyabr tarixlərində “Oxu. Düşün. Əlaqələndir” devizi altında 76-cı Frankfurt Beynəlxalq Kitab Sərgisi baş tutub.Azərbaycan Nəşriyyatları Assosiasiyasından (ANAİB) verilən məlumata görə, ölkəmiz Mədəniyyət Nazirliyinin təşkilatçılığı ilə bu il də sərgidə xüsusi stendlə təmsil olunub. Sərgidə Azərbaycan nümayəndə heyətinin rəhbəri mədəniyyət nazirinin müavini Səadət Yusifova, o cümlədən ANAİB idarə heyətinin sədri, dosent Şəmil Sadiq, idarə heyətinin üzvü, “Qədim Qala” Nəşriyyatının direktoru Şöhlət İxtiyaroğlu, “TEAS Press”, “Qələm” nəşriyyatlarının direktorları – Hafiz Eyyubov və Nicat İbrahimov, eləcə də yazıçı Rövşən Abdullaoğlu iştirak ediblər. Sərgi çərçivəsində Çinin Mədəniyyət Nazirliyinin əməkdaşları Azərbaycan stendinin qonağı olub. Bundan başqa, kitabçılığın perspektivləri ilə bağlı müxtəlif görüşlər keçirilib, müzakirələr aparılıb.Bundan başqa, Frankfurt Beynəlxalq Kitab Sərgisində Azərbaycan, Kipr, Yunanıstan və Türkiyə üzrə koordinator Hanife İçtenlə görüş baş tutub. Görüşdə müxtəlif məsələlər müzakirəyə çıxarılıb.Türkiyə Mədəniyyət və Turizm Nazirliyinin nümayəndələri, İstanbul Ticarət Odası və Türkiyə Naşirlər Birliyinin başqanları ilə Azərbaycan kitabçılığının inkişafı ilə bağlı danışıqlar aparılıb.Qeyd edək ki, 95 ölkədən 4000 nəfərin bir araya gəldiyi sərgi kitabçılıq sahəsində çalışan minlərlə mütəxəssisin yeni əməkdaşlıqlar qurması və təcrübə mübadiləsi üçün mühim platformadır.

Azərbaycan Nəşriyyatları Assosiasiyası İctimai Birliyi (ANAİB), Təhsilin İnkişafı Fondu (TİF) və Azərbaycan Gənc Müəllimlər Assosiasiyasının (AGMA) birgə təşkilatçılığı ilə təşkil olunan IV Kitabqurdu Müəllimlərin Oxu Marafonunun final oyunu və mükafatlandırma mərasimi keçirilib. ANAİB xəbər verir ki, yekun mərhələ imtahan əsasında seçilmiş 10 nəfər arasında keçirilib. 30 suala cavab verən iştirakçılar arasından toplanan ballara müvafiq olaraq qaliblər müəyyənləşib. Birinci yeri Aynurə Şərifova, ikinci yeri Vüsalə Məmmədova, üçüncü yeri isə Nigar Piriyeva qazanıb. Əvvəlcədən elan olunmuş mükafat fonduna əsasən birinci yerin sahibi 1000, ikinci yerin sahibi 600, üçüncü yerin sahibi isə 400 manat məbləğində mükafat əldə edib. Bundan başqa, final mərhələsinin iştirakçılarına müxtəlif hədiyyələr, diplom və sertifikatlar təqdim olunub. Mərasimdə çıxış edən ANAİB sədri Şəmil Sadiq, layihə rəhbəri, “XAN Nəşriyyatı”nın direktoru Səbuhi Şahmursoy, AGMA-nın mətbuat katibi Fidan Quluzadə, Azərbaycan Yazıçılar Birliyinin katibi Səlim Babullaoğlu, Elm və Təhsil Nazirliyi yanında İctimai Şuranın sədr müavini Nadir İsrafilov, “Libra”, “Qədim Qala”, “Parlaq İmzalar”, “AlfaCin” nəşriyyatlarının direktorları – Veysəl Məmmədov, Şöhlət İxtiyaroğlu, Nurman Tariq, Mübariz Həsənov, AYB-nin mətbuat katibi Xəyal Rza, “İnci Group of Companies” QSC-nin müşahidə şurası sədri Mikayıl Yusifov, eləcə də marafonda iştirak edən kitabların müəllifləri Rafiq İsmayılov, Rövşən Abdullaoğlu, marafonun məqsədindən, Azərbaycan kitabçılığı, naşirləri və oxucuları üçün önəmindən danışıb, belə tədbirlərin ənənəyə çevrilməsinin vacibliyindən söz açıblar. Tədbirdə Təhsilin İnkişafı Fondunun idarə heyəti sədrinin müavini Xanım Daşdəmirova, pedaqoji elmlər doktoru Hikmət Əlizadə, Tusi Tərtibat Mərkəzinin direktoru Əli İbrahimbəyli, tarixçi Amil Həsənov, “Təhsil forumu” platformasının rəhbəri Emil Tağızadə, o cümlədən hər üç təşkilatçı qurumun nümayəndələri, naşirlər, ədəbiyyat, təhsil və media nümayəndələri iştirak ediblər. Qeyd edək ki, oxu müddəti 15 aprel 2024-cü il tarixindən başlanan marafonda ANAİB-ə üzv nəşriyyatlara məxsus 6 kitab seçilib:Şəmil Sadiq – “İnsan mühəndisi”Nəşriyyat: “Hədəf Nəşrləri”Nihat Büyükbaş – “Türk təhsili”Nəşriyyat: “XAN Nəşriyyatı”Rafiq İsmayılov – “Düzgün yazaq”Nəşriyyat: “Altun Kitab”Rəşad Bayramov – “Sözünə güvən” Nəşriyyat: “Parlaq İmzalar” Gülüş Xəlilova – “Günəşə baxmaq”Nəşriyyat: “Libra Kitab”Rövşən Abdullaoğlu – “Üzləşmə”Nəşriyyat: “Qədim Qala”Marafonun əsas şərtlərindən biri aktiv müəllimlik fəaliyyəti olan şəxslər arasında keçirilməsidir. İştirakçılar müəyyən edilmiş müddət ərzində seçilmiş 6 kitabı oxuyub və imtahan vasitəsilə finala vəsiqə qazanıblar.Əlavə məlumat üçün bildirək ki, ANAİB-in əsas təşkilatçılığı ilə 12 – 16 yaşlı məktəblilər üçün I Kitabqurdu Yay Oxu Marafonu, 16 yaşdan yuxarı oxucular üçün II Kitabqurdu Payız Oxu Marafonu, 6 – 10 yaşlı məktəblilər üçün III Kitabqurdu Yaz Oxu Marafonu keçirilib. Sentyabrın 1-dən başlanan daha bir marafon isə V Kitabqurdu Məhkum Qadınların Oxu Marafonu adlanır və yalnız 4 saylı Cəzaçəkmə Müəssisəsində cəza çəkən qadınların iştirakı ilə həyata keçirilir.

İyulun 2-də Azərbaycanda Atatürk Mərkəzində Mədəniyyət Nazirliyi yanında İctimai Şura ilə “Azərbaycan Nəşriyyatları Assosiasiyası” İctimai Birliyi (ANAİB) “Azərbaycan kitabçılığının durumu: dövlət və özəl sektor əməkdaşlığı” adlı birgə müzakirə keçirib.Anaib.az xəbər verir ki, Mədəniyyət Nazirliyi yanında İctimai Şuranın sədr müavini Əkbər Qoşalının aparıcılığı ilə keçən görüşdə Milli Məclisin Mədəniyyət komitəsinin sədri Fazil Mustafa, Mədəniyyət nazirinin müavini Fərid Cəfərov, nazirliyin Kitab sənayesi şöbəsinin müdiri Akif Marifli, o cümlədən həmin şöbənin iki əməkdaşı, ANAİB-ə üzv olan iyirmi iki, üzv olmayan üç nəşriyyatın rəhbəri, QHT və media nümayəndələri, təşkilatçı qurumların rəhbərləri – ANAİB İdarə heyətinin sədri Şəmil Sadiq, Mədəniyyət Nazirliyi yanında İctimai Şuranın sədri, deputat, akademik Nizami Cəfərov və Şura üzvləri iştirak edib.Giriş nitqi ilə çıxış edən ANAİB İdarə heyətinin sədri Şəmil Sadiq görüşün məqsədindən, kitabçılıq sahəsində dövlət və özəl sektorun rahat və sıx ünsiyyətinin vacibliyindən danışıb, 27 nəşriyyatın ANAİB-də bir amal uğrunda birləşdiyini dilə gətirib.Ş.Sadiq Azərbaycan Naşirlərinin I Forumu və III Uşaq Kitab Festivalından söz açıb; kitaba təşviq layihələrinin yetərli olmadığını, gənc ədiblərin əsərlərinin nəşrinin arzuolunan şəkildə stimullaşdırılmadığını, kitabxanalara kitab alışının azlığını, tərcüməyə dəstək proqramının hələ də həyata keçirilmədiyini vurğulayıb.O bildirib ki, ölkəmizdə özəl qurumların təsis etdiyi ədəbiyyat və sənət dərgilərinin durumu acınacaqlıdır. Dərgi mədəniyyəti demək olar, tənəzzüldədir. Dərgilərin diqqətdən qıraqda qalması, onların kitabxanaların fonduna əlavə edilməməsi, dövlət dəstəyinin yoxluğu nəşriyyat sahəsinin xüsusi problemidir.ANAİB sədri digər media orqanlarına edildiyi kimi ədəbi dərgilərə də dəstəyin vacibliyini dilə gətirib.“Təhsil” nəşriyyatının direktoru Tural Axundov mətbəə ilə nəşriyyat sahələrinin vəhdətdə inkişafını önə çəkib və bu sahələri ayırmağın doğru olmadığını vurğulayıb. O, Mədəniyyət Nazirliyi ilə Elm və Təhsil Nazirliyinin kitab alışı siyasətindən razılığını ifadə edib.Çıxış üçün növbəti söz “Parlaq İmzalar” nəşriyyatının direktoru Nurman Tariqə verilib.N.Tariq ədəbiyyatın və dilin dövlətin mədəniyyət strategiyasında ən önəmli faktor olduğunu vurğulayıb.O bildirib ki, kitabxanaların fəaliyyəti genişləndirilməli, bu qurumların fondu üçün kitab alışı artırılmalı, eyni zamanda, kitabxanalardakı kiril qrafikalı kitablar latın qrafikalı olanlarla əvəzlənməlidir.Nurman Tariq ölkədə Kino Agentliyinin olduğu kimi Kitab Agentliyinə də ehtiyac duyulduğunu bildirib.“Əlfəcin” nəşriyyatı və Göygöl şəhərində fəaliyyət göstərən “Göygöl” kitab evinin rəhbəri Mübariz Həsənov bölgələrdə kitabçılığın əsas problemlərindən söz açıb. Mədəniyyət Nazirliyinin regionda təşkil edilən kitab sərgilərinə dəstəyinin, kitabxanalar üçün kitabların mətbəələrdən yox, nəşriyyatlardan satın alınmasının, hər rayon mərkəzində (ilkin olaraq) bir pilot kitabxananın yaradılmasının və bu təcrübənin daha sonra qəsəbə-kənd kitabxanalarında tətbiqinin, Bakı Beynəlxalq Kitab Sərgisində nəşriyyatlara daha çox yer ayrılmasının önəmini qeyd edib.Növbəti çıxış üçün söz alan “Ağıllı Bala” nəşriyyatının rəhbəri Fatimə Alxaz ölkədə uşaq kitabları, uşaq yazarları və illüstratorları probleminə diqqət çəkib, uşaq ədəbiyyatının inkişafı ilə bağlı məsələlərdən danışıb.F.Alxaz uşaq ədəbiyyatı ilə bağlı bir neçə nominasiyada mükafatın təsisi, uşaq yazıçılarının həvəsləndirilməsi, ölkədə və xaricdə tanınması yönündə silsilə tədbirlərin həyata keçirilməsi mövzusunda təkliflər irəli sürüb.Çıxışçı 6 – 9 iyun tarixlərində keçirilən III Uşaq Kitab Festivalının konsepti barədə danışıb və müvafiq qurumların rəsmilərinin məsələyə daha üstün diqqətinin arzu olunduğunu deyib.“Altun Kitab” nəşriyyatının rəhbəri Rafiq İsmayılov vurğulayıb ki, özəl sektorun bu sahəyə nə dərəcədə məsuliyyətlə yanaşacağını dövlətin strategiyası təyin edir. Ona görə də kitabçılığın, ədəbiyyatın əsas qoruyucu qurumu olan Mədəniyyət Nazirliyi bu sahəyə diqqətini artırmalı, yeni layihələrlə çıxış etməlidir.Daha sonra “Libra Kitab” nəşriyyatının direktoru Veysəl Məmmədov çıxışında bu sahə üzrə xarici əlaqələrdən, beynəlxalq kitab sərgilərindən bəhs edib. Ölkəmizdə keçirilən Bakı Beynəlxalq Kitab Sərgisinin hazırlıqlarının il boyu aparılması, naşirlərin bu prosesdə yer alması, il boyu dövlət tərəfindən keçirilən sərgi və tədbirlər barədə geniş məlumatların verilməsi kimi məsələlərinin vacibliyini vurğulayıb.İctimai Şuranın sədr müavini Vüqar Qədirov öz çıxışında bir sıra köklü məsələlərə, o cümlədən təhsil mövzusuna toxunub.“Qələm” nəşriyyatının rəhbəri Hafiz Eyyubov bildirib ki, ölkəyə idxal olunan kağız ƏDV-dən azad olunsa da, bu qayda yalnız Rusiyadan gətirilən kağızlara şamil edilir, Avropadan gətirilənlərə şamil edilmir. O, sözügedən problemin tezliklə həll edilməsinin vacibiyini diqqətə çatdırıb.Milli Məclisin Mədəniyyət komitəsinin sədri Fazil Mustafa bu tədbirə, əsasən, problem dinləməyə gəldiyini deyib. Ölkədə kitab oxumayan, özünü kadr kimi yetişdirməyən gənclərin az olmadığından, dərin fəlsəfi kitabların yazılmamasından, tərcümələrin isə qənaətbəxş olmadığından, bu sferada terminologiyanın inkişaf etməməsindən, məktəblilərin yazı bacarıqlarının əskikliyindən, məktəblərdə oxuya təşviqin azlığından söz açıb.F.Mustafa vurğulayıb ki, dövlət son zamanlar aktivləşən kitab sərgilərinə bacardıqca çox dəstək verməli, bunun üçün özəl sektordan layihələr istəməli, bu təşkilatçılıqda öz resurslarından səmərəli istifadə etməlidir.İctimai Şuranın sədri Nizami Cəfərov öz nitqində Mədəniyyət Nazirliyi Nəşr Planının Tərtibi və Nəşriyyat Məhsullarının Satınalınması üzrə Komissiyasının fəaliyyətinin genişləndirilməsini təklif edib, qurumu ANAİB tərəfindən təşkil olunan silsilə kitab sərgilərinə aktiv dəstək verməyə çağırıb.Mədəniyyət nazirinin müavini Fərid Cəfərov regionlarda keçirilən kitab sərgilərində Mədəniyyət Nazirliyinin həmişə öz resurslarından istifadəyə hazır olduğunu bildirib. Hətta indiyə kimi keçirilən kitab sərgilərinin bir xeylisi üçün müxtəlif bölgələrdə məkan və bəzi imkanların təşkilatçılara təklif edildiyini deyib.O, xaricdə keçirilən müxtəlif beynəlxalq kitab sərgilərində iştirak üçün həmişə yerli nəşriyyatlara şərait yaradıldığını, bu il bir neçə sərgiyə özəl sektor nümayəndələrinin də cəlb olunduğunu, bütün xərclərin nazirlik tərəfindən qarşılandığını qeyd edib.F.Cəfərov Mədəniyyət Nazirliyi Nəşr Planının Tərtibi və Nəşriyyat Məhsullarının Satınalınması üzrə Komissiyasının fəaliyyət planının hər il detallı şəkildə elan edildiyini, nazirliyin kiril qrafikalı kitabların latın qrafikalı kitablarla əvəzlənməsi üçün işlər apardığını, Kitab Agentliyinin yaradılmasının planlar arasında olduğunu, Azərbaycan ədəbiyyatına dəstək layihəsi üzərində işlər getdiyini, kitabxanaların effektiv fəaliyyəti ilə bağlı “yol xəritəsi” hazırlandığını və son olaraq ANAİB tərəfindən təşkil olunan Azərbaycan Naşirlərinin I Forumu və III Uşaq Kitab Festivalında Mədəniyyət Nazirliyinin müvafiq şöbəsinin əməkdaşlarının qatıldığını bildirib.Nazir müavini müzakirələrin gələcək fəaliyyət və işbirliyi üçün faydalı olacağına inandığını söyləyib.

6 – 9 iyun tarixlərində “Abu Arena”da “Azərbaycan Nəşriyyatları Assosiasiyası” İctimai Birliyinin təşkilatçılığı ilə “Yaşıl Dünya naminə Həmrəylik İli”nə həsr olunan III Uşaq Kitab Festivalı keçirilib.Anaib.az xəbər verir ki, budəfəki festivalı əvvəlkilərdən fərqləndirən tematik günlərə ayrılması olub. İyunun 6-sı Yaşıl Dünya, 8-i Milli Geyimlər, 9-u isə Mənim Nağıl Qəhrəmanım günləri elan edilib. Yaşıl Dünya Günündə Ekologiya və Təbii Sərvətlər Nazirliyinin dəstəyi ilə iştirakçılara yaşıl torbalarda toxumlar paylanılıb. Milli Geyimlər Günündə təşkilatçılar, iştirakçılar və ziyarətçilər milli paltarlara üstünlük veriblər. Mənim Nağıl Qəhrəmanım Günündə isə hərə öz nağıl personajını canlandırıb. Festivalın açılış mərasimində ANAİB sədri Şəmil Sadiq, Türkiyənin məşhur uşaq yazıçısı Suat Turqut, “Altun Kitab” nəşriyyatının direktoru Rafiq İsmayılov, sərginin layihə rəhbəri, “Ağıllı bala” nəşriyyatının direktoru Fatimə Alxaz çıxış edib, bu kimi layihələrin Azərbaycan kitabçılığına, ümumilikdə ölkənin gələcəyinə yatırım kimi qiymətləndiriblər. Festivalda Şəmil Sadiq, Sevinc Elsevər, Aynur Cavid, Rövşən Abdullaoğlu, Reyhan Yusifqızı, Elgüsel, Fatimə Alxaz, Amin Sükut, Əziz Yaqubzadə, Çinarə Köçərli, İradə Qədirova, Mürşüd İsmayılzadə, Aytac Qəmbərova, Günel Əliyeva, Elmir İsgəndərov və başqa yazıçıların təqdimat, imza mərasimləri baş tutub. Türkiyənin məşhur uşaq yazıçısı Suat Turqut da tədbirin qonağı olub. Bundan başqa, sərgidə Gülzar İbrahimova, Mehriban Nağıyeva, Xəzər Süleymanlı, Kamal Yaşar, Şəbnəm Həsənəlizadə, Afaq Muradın ifasında qiraət və nağıl saatları, müğənni Röyal Musanın təqdimatında mini-konsert proqramı, Elmar İbrahimovun sehrbazlıq şousu iştirakçılar tərəfindən maraqla qarşılanıb. Azərbaycan klassik ədəbiyyatının görkəmli nümayəndələri Abdulla Şaiq və Mirzə Ələkbər Sabirin varisləri ilə görüş də tədbirə rəng qatıb. Sərgidə on minlərlə kitabın endirimli qiymətlərlə satışı, master-klaslar, məşhurların nağıl saatları, kukla teatrı, əyləncəli tamaşalar, intellektual oyunlar təşkil edilib. Tədbirdə oxucular məşhur uşaq yazıçılarından imzalı kitablar əldə edib, onlarla ünsiyyət qurublar. Festivalın sponsorları “Azsur Group”, “MUSİAD Azərbaycan”, “Azam Group”, “Premium Layihə İnşaat”, “Topxana Layihə İnşaat”, “Nağıoğlu construction”, “SQS Group”, dəstəkçiləri isə Azərbaycan Ekologiya və Təbii Sərvətlər Nazirliyi və “Supertoys” mağazalar şəbəkəsi olub. 

Mayın 12-də III “Kitabqurdu” Yaz Oxu Marafonu çərçivəsində “Buknik” layihəsi keçirilib. Anaib.az xəbər verir ki, 70-dən çox şagirdin, onların valideynlərinin, eləcə də ətraf ərazidə yaşayan sakinlərin iştirakı ilə baş tutan “Buknik” layihəsi kifayət qədər uğurlu alınıb. Əvvəlcə komandalar şəklində parkın girişində toplanan uşaqlar arasında ünsiyyət təmin edilib. Uşaqlar fəaliyyətin sonunda dostlaşıb, növbəti görüşləri planlaşdırmağa başlayıblar. Daha sonra oyun məkanında iştirakçılar komandalara bölünüb və aralarında müxtəlif yarışlar keçirilib. Qaliblərə kitab hədiyyələri təqdim ol. Ardınca komandalar parkın müxtəlif yerlərində quraşdırılan imza köşklərində müəlliflərlə görüşüb, şəkil çəkdirib, kitablarını imzalatdırıb, yeni kitablar haqqında məlumat alıblar. Sonda aktyor Kamal Yaşarın təqdimatında nağıl saatı baş tutub.Qeyd edək ki, Azərbaycan Nəşriyyatları Assosiasiyası, Təhsilin İnkişafı Fondu və “SİMART” Sağlam İnkişaf Platformasının təşkilatçılığı ilə keçirilən III “Kitabqurdu” Yaz Oxu Marafonuna 6 – 10 yaşlı uşaqlar qoşula bilərlər. Daha az yaşı olan uşaqların iştirakı isə valideynin tövsiyə və nəzarəti əsasında mümkündür. Kitablar 6 – 10 yaşlı uşaqlar (ibtidai siniflər) üçün nəzərdə tutulub. İştirakçılar marafonun rəsmi teleqram səhifəsinə qoşulmalıdırlar. Səhifədə kitablar, eləcə də imtahan mərhələsi ilə bağlı məlumatlar paylaşılər.İştirakçılar seçilmiş 6 kitabı iyunun 25-dək oxumalıdırlar. Müsabiqə iki mərhələdən ibarətdir. Suallar iştirakçıların mütaliə etdiyi 6 kitab əsasında hazırlanacaq. İmtahanın ilk mərhələsi onlayn qaydada həyata keçiriləcək. Bu mərhələdə ən yüksək göstəriciyə malik on nəfər finala vəsiqə qazanacaq.Final mərhələsi təyin olunmuş studiyada on nəfər arasında baş tutacaq. Birinci yeri tutan iştirakçıya 1000, ikinci yeri tutan iştirakçıya 500, üçüncü yeri tutan iştirakçıya isə 300 AZN mükafat, digər 7 nəfərə isə kitab hədiyyələri və sertifikatlar veriləcək.İştirakçılar marafonda iştirak etmək üçün aşağıdakı kitabları oxumalıdırlar:- Amin Sükut – “Dovşan nə üçün Yeni il şənliyinə qatılmadı?”- Elgüsel – “Yumağın macəraları”- Fatimə Alxaz – “Buku, qaranlıq və Toki”- Xəyalə Murad – “Bir yarpağın arzusu”- Sevinc Elsevər – “Novruz nağılı”- Zahid Xəlil – “Bizim kəndin nağılları”Marafonun teleqram kanalına bu link vasitəsilə qoşula bilərsiniz:https://t.me/IIIkitabqurdu_marafonu