“Azərbaycan Nəşriyyatları Assosiasiyası” İctimai Birliyi (ANAİB) Milli Mətbuat Günü münasibətilə media nümayəndələri ilə görüş keçirib.ANAİB.az xəbər verir ki, birliyin idarə heyətinin sədri Şəmil Sadiq media nümayəndələrini Mətbuat Günü münasibətilə təbrik edib. Daha sonra birliyin ikiillik fəaliyyəti haqqında məlumat verib, ANAİB-in fəaliyyətinin işıqlandırılmasında medianın dəstəyini vurğulayıb.Mədəniyyət Nazirliyinin Kitab sənayesi şöbəsinin müdiri Akif Marifli ANAİB-in fəaliyyətini yüksək qiymətləndirdiklərini və ölkədəki lokal sərgilərin keçirilməsinin birliyə həvalə olunmasını arzuladıqlarını vurğulayıb.Mədəniyyət Nazirliyinin elan etdiyi satınalma müsabiqəsinin nəticələrinə əsasən, nəşriyyatlardan beş yüz min manatlıq kitabın satın alındığını qeyd edən Akif Marifli gələcəkdə bu rəqəmin daha da artacağını diqqətə çatdırıb.ANAİB-in sədr müavini Nurman Tariq çıxışı zamanı ölkədə ən çox oxunulan kitabların kateqoriyalaşdırılması və statistikasının aparılması məqsədilə oxucular arasında keçirilən onlayn sorğunun statistikasını təqdim edib. İdxal olunan kitabların daha çox rəğbət görməsinin səbəblərini izah edən Nurman Tariq yerli nəşriyyat sektoruna qayğının artırılmasının zəruriliyini bildirib.Daha sonra birliyin koordinatoru Fizzə Məmmədova ikiillik fəaliyyəti əhatə edən slaydı təqdim edib, ANAİB-in bu günə qədər həyata keçirdiyi layihələrdən söz açıb.“Altun Kitab” nəşriyyatının direktoru Rafiq İsmayılov, Əməkdar jurnalist Qulu Məhərrəmli, Azərbaycan Jurnalistlər Birliyinin sədri Elçin Şıxlı, şair, ədəbiyyatşünas Qismət Rüstəmov, “Çapar” nəşriyyatının baş redaktoru Dilqəm Əhməd, “Türküstan” qəzetinin baş redaktoru Aqil Camal öz çıxışlarında nəşriyyat və media sahələrinin bir-biri ilə əlaqəli olmasından, eləcə də atılmalı addımlardan, müsbət və mənfi tendensiyalardan bəhs ediblər. Görüş müzakirə formatında davam edib.

“Çağdaş ədəbiyyatımızda dil və üslub” adlı seminar keçirilib.Mayın 19-u Azərbaycan Nəşriyyatları Assosiasiyası İctimai Birliyi (ANAİB), AMEA Nizami adına Ədəbiyyat İnstitutu və Nəsimi adına Dilçilik İnstitutunun birgə təşkilatçılığı ilə “Çağdaş ədəbiyyatımızda dil və üslub” adlı elmi-praktik seminar keçirilib. ANAİB.az xəbər verir ki, seminarı Ədəbiyyat İnstitunun direktoru, akademik İsa Həbibbəyli açıb. Akademik çıxışında çağdaş ədəbiyyatın, eləcə də nəşriyyatların qarşılaşdıqları əsas problemlərdən, kitabçılıqdakı çatışmazlıqlardan, eyni zamanda müsbət tendensiyalardan söz açıb. ANAİB idarə heyətinin sədri, filologiya üzrə fəlsəfə doktoru Şəmil Sadiq çıxışında seminarda toxunulacaq mövzular barədə məlumat verib, ədəbiyyatşünaslığın, dilçiliyin qarşısında dayanan vacib problemlərdən və onların həlli yollarından danışıb. Daha sonra “Altun Kitab” nəşriyyatının direktoru Rafiq İsmayılov “Dil qaydaları və yazı praktikası: ziddiyyətli məqamlar”, şair, Azərbaycan Dövlət Tərcümə Mərkəzinin əməkdaşı Etimad Başkeçid “Tərcümənin əbədi dilemması: orijinala sadiqlik, yoxsa mətnin oxunaqlığı?”, ədəbiyyatşünas, “Dünya ədəbiyyatı” jurnalının baş redaktoru Seyfəddin Hüseynli “Çağdaş kitabçılıqda və ədəbi nəşrlərdə redaktə məsələləri” adlı məruzələrini təqdim edib, qoyduqları problemlərdən çıxış yollarını göstəriblər. Tədbir sual-cavab və müzakirə formatında davam edib. İşıqlandıran saytlar: 525-ci qəzet, Sabahinfo.az, Kulis.az, Ceylanmumoğlu.com, Edebiyyatqazeti.az, Hedefnesrleri.az, Sia.az, Avanqard.net, Kultur.az.

Gəncədə möhtəşəm kitab sərgisi keçirilib26-28 noyabr tarixlərində Gəncədə “Azərbaycan Nəşriyyatları” İctimai Birliyinin (ANİB) təşkilatçılığı ilə “I Gəncə Kitab Sərgisi” təşkil olunub.“Nizami Gəncəvi İli”nə həsr edilən sərgidə ölkənin 30-dan artıq nəşriyyatı və 10-dan çox kitab evi iştirak edib.Sərgidə kitablara 50%-dək endirim tətbiq olunub, məşhur şair və yazıçıların iştirakı ilə təqdimatlar, imza mərasimləri, şeir gecələri, uşaqlar üçün nağıl saatları, rəssamların, müxtəlif sənət nümayəndələrinin əsərlərindən ibarət sərginin təşkili və musiqi proqramları keçirilib.ANAİB-in innovativ layihəsi olan “Öz kitabını sat” guşəsi öz kitabını təqdim etmək istəyən müəlliflər üçün nəzərdə tutulub. “Qarabağa kitabla gedirik” stendində isə işğaldan azad edilmiş ərazilərimizdə yaradılacaq kitabxana fondlarına dəstək məqsədilə kitablar toplanıb.ANAİB-in sədri Şəmil Sadiq bildirib: “Oxucular yeni kitablarla tanış olub, endirimlərdən yararlanıblar. Ən təbii istəyimiz “Nizami Gəncəvi İli”ndə, Nizami yurdunda möhtəşəm kitab bayramı təşkil edərək yerli kitabsevərləri sevindirmək idi”. “I Gəncə Kitab Sərgisi”nin təşkilat qrupunun rəhbəri Nurman Tariq isə kitabı paytaxtdan kənara çıxarmağın əhəmiyyətini vurğulayıb: “ANAİB tərəfindən 30-31 oktyabr tarixlərində Sumqayıt şəhərində təşkil olunmuş kitab sərgisi anşlaqla yadda qaldı və bu sərgi sübut etdi ki, bölgələrimizdə də kifayət qədər oxucu var, sadəcə kitab onlar üçün əlçatan deyil. Bunun üçün də ANAİB olaraq hədəfimiz nəşriyyat və yazıçılarla birlikdə bölgə-bölgə gəzmək, kitabı bölgələrimizə yaymaqdır. Kitabçılıq başqa cür inkişaf etməyəcək. Budəfəki dayanacağımız isə mədəniyyət şəhərimiz Gəncədir.”. Nurman Tariq tədbirin layiqli baş tutması üçün yaxından dəstək göstərən Mədəniyyət Nazirliyi, Gəncə Regional Mədəniyyət İdarəsi, Gəncə Şəhər İcra Hakimiyyəti və Gəncə İctimai İştirakçılıq Məclisinə xüsusi təşəkkürünü bildirib.

23-24 aprel tarixlərində Xırdalan şəhərində yerləşən Heydər Əliyev parkında filologiya üzrə fəlsəfə doktoru, dosent, yazıçı Şəmil Sadiqin ideya müəllifi olduğu “Oxu Günü-8” sərgi-festivalı keçirilib.Festivalın təşkilatçıları Abşeron Rayon İcra Hakimiyyəti, “Hədəf Nəşrləri”, “Azərbaycan Nəşriyyatları Assosiasiyası” İctimai Birliyidir.Festival Azərbaycan Respublikası Təhsil nazirinin 4 mart 2019-cu il tarixli qərarına əsasən hər il aprelin 23-də “Ümumdünya Kitab və Müəlliflik Hüququ Günü” münasibətilə respublikanın rayon və şəhərlərində ümumtəhsil məktəblərinin iştirakı təmin olunmaqla keçirilir.“Gəlin birgə oxuyaq!” şüarı ilə keçirilən sərgi-festivalda otuza yaxın nəşriyyat, ondan çox kitab mağazası, yazıçılar, şairlər, ziyalılar, incəsənət nümayəndələri, uşaq inkişaf mərkəzləri iştirak edib.Tədbirin proqramı aşağıdakı kimi olub:– “Gəlin birgə oxuyaq” fləşmobuna qatılıb minlərlə oxucu ilə eyni anda kütləvi mütaliə həyəcanı yaşamaq;– sosial şəbəkə hesablarında oxuduqları kitabla birlikdə şəkillərini #gelinbirgeoxuyaq haştaqı ilə paylaşaraq “Oxu Günü”nün mütaliə ulduzları siyahısına düşmək;– “Gəlin birgə oxuyaq” şüarı ilə əllərində kitabla çağırış edərək video çəkib sosial şəbəkə hesablarında paylaşmaq;– tanınmış yazıçılar, elm adamları, ictimaiyyət nümayəndələri ilə görüş;– oxuduğu kitabı özü ilə gətirib, imzalayıb seçdiyiniz iştirakçıya hədiyyə etmək;– məxsusi qurulmuş səhnədə iştirakçılara öz istedadını nümayiş etdirmək;– “face-art” vasitəsilə məşhur yazıçıların simasına bürünmək;– seçilmiş kitabları alaraq rəssamdan öz karikaturanı əldə etmək;– balaca oxucuların hədəf atışı edərək kitab hədiyyə qazanması;– balaca oxucular üçün mütaliə və nağıl saatları;– şahmat həvəskarlarının oyunda qalib gələrək kitab hədiyyəsi alması;– “Kitabı ağaca çevirək!” stendindən “Özün al, özün ödə” formatında kitab alıb texnobağın salınmasına dəstək vermək;– rəsmilərin uşaqlara kitab oxuma saatları;– kukla teatr tamaşalarının qonağı olmaq;– tanınmış əsərlərdəki monoloqlardan teatral parçalar səsləndirmək;– “Sürətli oxu” yarışında iştirak edib kitab qazanmaq kimi maraqlı və əyləncəli aksiyalara şahid olmaq.Xatırladaq ki, “Oxu Günü” aksiyası 2015-ci ildən etibarən mütəmadi təşkil olunur. 2020-2021-ci illərdə isə pandemiya səbəbi ilə onlayn formada həyata keçirilib.Əlavə məlumat üçün bildirək ki, sərgi iki gün müddətində saat 10:00-dan 20:00-dək davam edib.Qeyd edək ki, sərgi-festivalın baş sponsoru “Hedef Group”dur.Tədbirin informasiya dəstəkçiləri AzTV, “525-ci qəzet”, “Senet.az” və “Azedu.az” saytları, eləcə də “Ustad” dərgisidir.

Azərbaycanda ilk: “I Uşaq Kitab Festivalı” keçirildi2-3 aprel tarixlərində Azərbaycan Nəşriyyatları Assosiasiyası İctimai Birliyinin (ANAİB) təşkilatçılığı ilə ölkədə ilk dəfə “I Uşaq Kitab Festivalı” keçirilib.“Passage-1901”də keçirilən festivala iki gün ərzində iyirmi mindən çox ziyarətçi qatılıb, o cümlədən yüz məktəbdən iki yüz iyirmidən çox sinif iştirak edib.2 Aprel Beynəlxalq Uşaq Kitabı Gününə həsr olunan sərgidə on yeddi nəşriyyat, beş kitab mağazası, eləcə də ondan çox uşaq inkişaf mərkəzi və digər sahələri təmsil edən qurumlar iştirak edib.Bundan başqa, uşaq bayramına “Hədəf Nəşrləri”nin dəvəti ilə Türkiyənin tanınmış uşaq yazıçısı Suat Turqut, Türk Dünyası Araşdırmaları Vəqfinin sədri Közxan Yazqan, türkoloq Bünyamin Ağsunqur da qatılıblar.Festival çərçivəsində Təhsil Nazirliyinin təşkil etdiyi “Düşünən oxucu” müsabiqəsinin mükafatlandırılma mərasimi baş tutub. Mərasimdə təhsil nazirinin müavini Firudin Qurbanov çıxış edib, bu qəbildən olan festivalların, müsabiqələrin vacibliyindən danışıb. Sərgi ilə tanış olan Azərbaycan Respublikasının Ailə, Qadın və Uşaq Problemləri üzrə Dövlət Komitəsinin sədri Bahar Muradova öz fikirlərini bölüşüb, sərginin təşkilatçılarına təşəkkürünü çatdırıb. Komitə sədri qeyd edib ki, gələcəyimiz olan uşaqların kitabla, mütaliə ilə bağlılığını möhkəmləndirmək üçün bu kimi festivallar mütəmadi keçirilməlidir. Onu da qeyd edək ki, iki gün davam edən festivalda hökumət və ictimaiyyət nümayəndələri, siyasətçilər, təhsil işçiləri, ədəbiyyat adamları, jurnalistlər, tələbələr, eləcə də bir çox kəsimdən olan şəxslər iştirak ediblər. Festivalda təqdimatlar, imza mərasimləri, müxtəlif mövzuda masterklaslar, uşaqlar üçün əyləncəli proqramlar gerçəkləşdirilib. ANAİB sədri Şəmil Sadiqin sözlərinə görə, bu kimi festivalların davamlı olacağı nəzərdə tutulur.