19 – 22 dekabr tarixlərində “Azərbaycan Nəşriyyatları Assosiasiyası” İctimai Birliyinin təşkilatçılığı ilə ANAİB I Bakı Kitab Festivalı keçirilib.Anaib.az xəbər verir ki, festival Bakı Əl Oyunları Sarayında baş tutub.“Yeni ilə yeni kitablarla!” şüarı ilə keçirilən festivala ANAİB üzvü olan nəşriyyatlarla yanaşı, digər nəşriyyatlar da qatılıb, öz kitablarını təqdim ediblər. Açılış mərasimində ANAİB idarə heyətinin sədri Şəmil Sadiq, Xalq şairi Sabir Rüstəmxanlı, Milli Məclisin Mədəniyyət komitəsi sədri Fazil Mustafa, Milli Məclisin Mədəniyyət məsələləri daimi komissiyasının sədri Nizami Cəfərov, Azərbaycan Mətbuat Şurasının sədri Rəşad Məcid, Əməkdar artist Rafiq Həşimov çıxış edərək bu kimi tədbirlərin vacibliyindən, Azərbaycan kitabçılığına verdiyi töhfələrdən danışıb, ənənə kimi formalaşmasının mühümlüyündən söz açıblar. Festival çərçivəsində ANAİB-in kitab sənayesinin inkişafı və təbliği ilə bağlı təsis etdiyi 3 mükafat sahibinə təqdim edilib. Azərbaycanda mütaliə mədəniyyətinin inkişafındakı xidmətlərinə görə verilən “Daş kitabə” mükafatı Fazil Mustafaya təqdim edilib. Ailə Qadın və Uşaq Problemləriüzrə Dövlət Komitəsinin sədri Bahar Muradova, Təhsilin İnkişafı Fondu sədri Elnur Nəsibov, Mətbuat Şurasının sədri Rəşad Məcid və Əməkdar artist Rafiq Həşimov Kitabın səfiri nominasiyası ilə təltif olunublar.Mədəniyyət Nazirliyi yanında İctimai Şuranın sədr müavini Əkbər Qoşalı, “İnci” Şirkətlər Qrupunun idarə heyəti sədri Mikayıl Yusifov, Əməkdar jurnalistNüşabə Hüseynli, Azərbaycan Kinematoqrafçılar İttifaqının katibi Tahir Əliyev (Tahiroviç) və Azərbaycan Milli Elmlər Akademiyası Mərkəzi Elmi Kitabxanasının direktoru Hüseyn Hüseynov isə ANAİB-in Fəxri üzvü nominasiyası ilə təltif ediliblər. Yeni il əhval-ruhiyyəsində baş tutan festivalda Azərbaycanda ilk dəfə Kitablı toy da baş tutub. Belə ki, aktyor, Hədəf Liseyinin müəllimi Cavad Nur və həyat yoldaşı Ləman Abdullayeva toylarının ilk hissəsini festivalda keçiriblər. Toyda dövlət rəsmiləri, naşirlər çıxış edib, cütlüyə xoşbəxtlik arzulayıb, qiymətli hədiyyələr veriblər. Festivalda minlərlə kitab 90 %-dək endirimlə təklif olunub, Şəmil Sadiq, Varis, Elxan Elatlı, Rövşən Abdullaoğlu, İlqar Kamil, Zahid Xəlil kimi tanınmış yazarların təqdimatları, imza mərasimləri, məşhurlarla görüşlər, şeir saatları, təlimlər, panel və müzakirələr, uşaqlar üçün nağıl saatları təşkil edilib. Son illərdə keçirilən sərgilərin formatına əlavə kimi festivalda yerli qəzet və jurnallar stendlə təmsil olunub. Dörd gün davam edən festival hər gün 10:00-dan 20:00-dək fəaliyyət göstərib. Festivalda 30-dan çox nəşriyyat iştirak edib. 

Azərbaycan Nəşriyyatları Assosiasiyası kitab sənayesinin inkişafı və təbliği ilə bağlı 3 mükafat təsis edib.  Daş kitabə – Azərbaycanda mütaliə mədəniyyətinin inkişafındakı xidmətlərinə görə;Kitabın səfiri  – Azərbaycanda kitabçılıq işinin inkişafı və kitaba marağın artırılması istiqamətində ardıcıl fəaliyyətinə görə; ANAİB-in dostu – Azərbaycan Nəşriyyatları Assosiasiyası İctimai Birliyinin (ANAİB) təşkilatçılığı ilə keçirilən tədbirlərdə fəal iştirakına, maddi və mənəvi dəstəyinə görə.ANAİB sədri Şəmil Sadiqin sözlərinə görə, mükafat sahibləri hər ilin sonunda rəhbərlik etdiyi qurumun idarə heyəti tərəfindən müəyyənləşdirilərək sahiblərinə təqdim ediləcək. Sədr onu da bildirib ki, 2024-cü il üzrə mükafatın sahibləri artıq məlumdur. Mükafatlar öz sahiblərinə 19 – 22 dekabr tarixlərində keçiriləcək ANAİB I Bakı Kitab Festivalında təqdim olunacaq. Təqdimetmə mərasimi hər ilin sonunda ANAİB-in təşkil etdiyi Bakı Kitab Festivalında keçiriləcək. Mükafatlandırılanların siyahısını təqdim edirik:  “Daş kitabə” nominasiyasının qalibi:- Fazil Mustafa, Milli Məclisin İctimai birliklər və dini qurumlar komitəsi sədri. Kitabın səfiri nominasiyası ilə təltif edilənlər:- Fərid Cəfərov, mədəniyyət nazirinin müavini;- Bahar Muradova, Ailə Qadın və Uşaq Problemləriüzrə Dövlət Komitəsinin sədri;- Elnur Nəsibov, Təhsilin İnkişafı Fondu sədri;- Rəşad Məcid, Mətbuat Şurasının sədri;- Rafiq Həşimov, Əməkdar artist. ANAİB-in Fəxri üzvü nominasiyası ilə təltif edilənlər:- Əkbər Qoşalı, Mədəniyyət Nazirliyi yanında İctimai Şuranın sədr müavini;- Mikayıl Yusifov, “İnci” Şirkətlər Qrupunun idarə heyəti sədri;- Nüşabə Hüseynli, Əməkdar jurnalist;- Tahir Əliyev (Tahiroviç), Azərbaycan Kinematoqrafçılar İttifaqının katibi;-  Hüseyn Hüseynov, AMEA Mərkəzi Elmi Kitabxanasının direktoru.

19 – 22 dekabr tarixlərində “Azərbaycan Nəşriyyatları Assosiasiyası” İctimai Birliyi və Mədəniyyət Nazirliyinin birgə təşkilatçılığı ilə ANAİB I Bakı Kitab Festivalı keçiriləcək.Anaib.az xəbər verir ki, festival Bakı Əl Oyunları Sarayında baş tutacaq.“Yeni ilə yeni kitablarla!” şüarı ilə keçiriləcək festivala ANAİB üzvü olan nəşriyyatlarla yanaşı digər nəşriyyatlar da qatıla, öz kitablarını təqdim edə bilərlər. Yeni il əhval-ruhiyyəsində keçiriləcək sərgidə minlərlə kitab 90 %-dək endirimlə təklif olunacaq, tanınmış yazıçıların, şairlərin təqdimat və imza mərasimləri, məşhurlarla görüşlər, şeir saatları, uşaqlar üçün nağıl saatları təşkil ediləcək. Son illərdə keçirilən sərgilərin formatına əlavə kimi festivalda yerli qəzet və jurnallar stendlə təmsil olunacaq. Dörd gün davam edəcək festival hər gün 10:00-dan 20:00-dək oxucuların üzünə açıq olacaq. Festivalda 30-dan çox nəşriyyatın iştirakı gözlənilir. Giriş sərbəstdir.

6 – 8 dekabr tarixlərində “Azərbaycan Nəşriyyatları Assosiasiyası” İctimai Birliyi (ANAİB), Mədəniyyət Nazirliyi, Gəncə Şəhər İcra Hakimiyyəti və Gəncə İctimai İştirakçılıq Məclisinin birgə təşkilatçılığı ilə Fikrət Əmirov adına Gəncə Dövlət Filarmoniyasının Urban mərkəzində III Gəncə Kitab Sərgisi keçirilib. ANAİB xəbər verir ki, “Nizami yurduna kitabla gəlirik!” şüarı altında baş tutan sərgidə 30-dan çox tanınmış nəşriyyat iştirak edib.Açılış mərasimində ANAİB idarə heyətinin sədri Şəmil Sadiq, Gəncə şəhər icra hakiminin müavini Adil Tağıyev, Təhsilin İnkişafı fondunun sədri Elnur Nəsibov, Azərbaycan Ədəbiyyat Fondunun rəhbəri, yazıçı Varis, Gəncə İctimai İştirakçılıq Məclisinin rəhbəri Müzadil Həsənov və ANAİB idarə heyətinin üzvü və Gəncə Kitab Sərgisinin təşkilat komitəsinin rəhbəri Mübariz Həsənov çıxış ediblər. Çıxışçılar bölgələrdə bu kimi tədbirlərin keçirilməsinin müsbət tərəflərindən bəhs edib, gələcəkdə daha mütəşəkkil formaya salınmasının vacibliyini vurğulayıblar.Sərgidə azıçılar Şəmil Sadiq, Varis, Elxan Elatlı, Rövşən Abdullaoğlu, Orxan Bəyov, Mahir Hüseynov, Siyavuş Quliyev, Elgüsel, Çinarə Köçərli, tarixçilər Mehdi Gəncəli, Əkbər N.Nəcəf, təlimçilər İlqar Hümbətov, Orxan Şahbaz və müğənni Röyal Musanın iştirakı ilə müxtəlif panellər, təqdimatlar, imza günləri, şeir gecələri, uşaqlar üçün nağıl saatları, master-klaslar və musiqili proqram təşkil olunub. Sərginin ilk günü kənd təsərrüfatı naziri Məcnun Məmmədov və Azərbaycan Dövlət Aqrar Universitetinin rektoru Zəfər Qurbanov da sərgini ziyarət ediblər. Ziyalılar, ədiblər, naşirlər, ictimaiyyət nümayəndələri və media mənsublarının qatıldığı sərgidə 90 %-dək endirimlər tətbiq olunub. Qeyd edək ki, sərginin baş sponsorları “DNK hospital”, “Oksi Group”, sponsorları isə Bani seminariyası, “Hedef Group”, “166” yükdaşıma və logistika şirkətidir.

Türkiyədə keçirilən 41-ci TÜYAP Beynəlxalq Kitab Sərgisi çərçivəsində “Azərbaycan Nəşriyyatları Assosiasiyası” İctimai Birliyi (ANAİB) ilə Türkiyə Nəşriyyatlar Birliyi arasında görüş keçirilib.Anaib.az xəbər verir ki, görüşdə hər iki ölkənin kitabçılıq sektoru ilə bağlı prioritetləri müzakirə olunub, nəşriyyatçılıq qarşısında dayanan əsas problemlər, əməkdaşlıq məsələləri barədə müxtəlif fikir və təkliflər səsləndirilib. Sonda iki qurum arasında 3 illik əməkdaşlıq memorandumu imzalanıb. Memoranduma əsasən hər iki birlik öz üzvləri ilə bağlı məlumatları bölüşəcək, bu informasiyanın cariliyini diqqət mərkəzində saxlayacaq. Bundan başqa, sektorun inkişafı, qarşıda dayanan problemlər və həll yolları təklif olunacaq, təşkil edilən sərgilər, festivallar barədə illik hesabatlar yazılacaq. Bu addımlar sayəsində qurumların fəaliyyət arealında mümkün əməkdaşlıqlar və investisiya təklifləri ilə bağlı yol xəritəsi hazırlanacaq. Qeyd edək ki, builki TÜYAP Kitab Sərgisində fəxri qonaq ölkə Azərbaycan olub. Ölkəmizin Mədəniyyət Nazirliyinin dəstəyi ilə 100-ə yaxın naşir, yazıçı və sənət adamı sərgiyə qatılıb. Azərbayacan nümayəndə heyətinin tərkibində ANAİB üzvü olan 15 naşir də sərgidə iştirak edib. Sərgidə xüsusi proqramla təmsil olunan ANAİB üzvləri türk və əcnəbi naşirlərlə görüşüb, müəllif hüquqları mövzusunda müzakirələr aparıb, müxtəlif panellərdə çıxış edib, yazıçılarının imza mərasimlərini təşkil edib və naşirlərin peşəkar toplantılarına qatılıblar.